"Where It's At" é unha canción do músico estadounidense de rock alternativo Beck, lanzada en maio de 1996 por DGC e Bong Load como o primeiro sinxelo do seu quinto álbum, Odelay (1996). Beck escribiu a canción en 1995 cos seus coprodutores John King e Michael Simpson (coñecidos como Dust Brothers), e estreouna no Lollapalooza o mesmo ano, nunha versión moi similar á súa encarnación en Odelay. Interpretou a canción con frecuencia desde 1995, experimentando habitualmente coa música e a letra. O seu vídeo musical foi dirixido por Steve Hanft.
"Where It's At" ten unha serie de mostras faladas que Beck e os Dust Brothers incorporaron. Moitas delas proceden dun escuro álbum de educación sexual titulado Sex for Teens: (Where It's At),[1] un subtítulo que Beck tomou prestado. Outras mostras vocais incorporadas a "Where It's At" proceden de "Needle to the Groove", do grupo de hip hop da vella escola Mantronix ("we've got two turntables and a microphone..."), así como de The Frogs ("that was a good drum break"). A canción tamén fai referencia a Gary Wilson, unha das influencias de Beck. Ademais, xusto antes de que comece a mostra de Frogs, a canción incorpora unha mostra musical da introdución da canción "Knock Him Out Sugar Ray" da coñecida banda de go-goE.U.
Beck gañou o premio Grammy á mellor interpretación vocal de rock masculino pola canción.[2] En outubro de 2011 NME colocouna no número 76 da súa lista das 150 mellores cancións dos últimos 15 anos.[3]
