2Cellos

2Cellos
Биографски податоци
Жанрови	рок, поп, класична музика
Инструменти	виолончело
Период на активност	2011 -
Издавачи	Сони Мастерворкс
Мреж. место

2Cellos (изговор: ту челос) е хрватско инструментално дуо составено од виолончелистите Лука Шулиќ и Стјепан Хаузер.

Почетоци

Лука Шулиќ и Стјепан Хаузер се запознале во своите тинејџерски години како ученици на Загребската музичка академија. Шулиќ подоцна ги продолжува своите студии на лондонската Кралска музичка академија (англиски: Royal Music Academy), а Хаузер студира музика на Кралскиот универзитет во Манчестер (англиски: Royal Northern College of Music). По долгогодишно искуство во класичната музика, тие се решаваат да направат преработка на хитот „Smooth Criminal“ од Мајкл Џексон. Во јануари 2011 година снимката станува огромен хит на ЈуТјуб со повеќе од три милиони прегледи во првите две седмици. Понатаму се одлучуваат да снимаат преработки на поп-рок песни, после долго размислување и желба за да направат нешто ново и оригинално во музиката, што инаку не би го постигнале само со свирење на класична музика.

Кариера

Како членови на продукциската куќа Сони Мастерворкс (англиски: Sony Masterworks го снимаат својот прв албум во јуни 2011 година. Истиот вклучува обработки на песни од ѕвезди како ЈуТу, Ганс`ен`Роузис, Најн Инч Неилс, Стинг, Колдплеј, Нирвана и други. Први синглови кои беа издадени од овој албум се „Smooth Criminal“ и „Welcome to the Jungle“.

Почнувајќи од летото 2011 година, учествуваат на повеќе турнеи со англискиот пејач Елтон Џон, по негова лична покана, откако тој ја слушнал нивната снимка и им предложил соработка. Досега имаат учествувано на повеќе од сто концерти низ целиот свет заедно со Елтон Џон.

Имаат гостувано во бројни разговорни емисии, меѓу кои и на „Елен Диџенерес Шоу“ (англиски: The Ellen DeGeneres Show) и „Перес ТВ.“ Настапувале и на iTunes фестивалот во Лондон во јули 2011 година.

Дискографија

Студиски албуми

• „2Cellos“ (2011)
• „In2ition“ (2012)

Концертни албуми

• „Живо од Арена Загреб“ (орг. Live at Arena Zagreb) (2013)